Хто, Што, Дзе

ХТО МЫ

Мы – гэта Гісторыка-краязнаўчае таварыства “ЭТНА”.

“Этна” - гэта суполка сяброў-аднадумцаў, пераважна студэнтаў, якім мілы родны кут, дзе за пушчай, за лесам, за балотам з дрыгвой вечную песню пяе Белавежа, дзе Нёман на захадзе помніць варожую кроў, дзе можна на поўныя грудзі ўдыхаць пах чабору, з замілаваннем слухаць рэха ў гаях і песню салаўя. Наша моц – Вострая брама святая, Чорны замак Альшанскі, кветка шыпшыны і пахучы бэз. Гэта нашыя тры чарапахі, кіты і сланы, падмурак нашага зямнога жыцця. Мы верым, што хутка зацвіце наш край, як сонца, пасля непагоды. Таму мы робім...

ШТО МЫ

Таварыства “ЭТНА” заснаванае 15 красавіка 2003 ў Менску.

Мы хочам зрабіць Беларусь беларускай. А для гэтага мы:

• Цікавімся і вывучаем гісторыка-культурную спадчыну Беларусі
• Спрыяем захаванню помнікаў архітэктуры
• Распаўсюджваем веды па гісторыі і культуры Беларусі
• Весялімся і адпачываем, вандруем і спяваем
• Кантактуем з моладзевымі арганізацыямі культурнай, гістарычнай, мастацкай і агульнаграмадскай скіраванасці
• Сябруем са студэнтамі Кракаўскага Ягелонскага універсітэта (Польшча), наладжваем студэнцкія абмены

Кароткія нарысы нашага супольнага існавання:

• 750 год КАРАНАЦЫІ МІНДОЎГА, лістапад’ 2002, г. Менск

  (тэатралізаванае прадстаўленне з выступам музычных і танцавальных гуртоў, рыцарскіх клубаў; навуковая канферэнцыя і выставы)

• КАНСЕРВАЦЫЯ КРЭЎСКАГА ЗАМКУ, жнівень’ 2004, жнівень’2005, в. Крэва

  (два маладзёвых валанцёрскіх летніка, падчас якіх былі зроблены працы па захаванні замка і сабраны багаты этнаграфічны матэрыял).

• ФЕСТЫВАЛЬ “КРЭЎСКІЯ КАМЯНІ”, верасень’ 2005, в. Крэва

  (з палудня да прыцемкаў каля старажытных муроў: танцы, спевы, ігрышчы ад менскіх артыстаў, а познім вечарам: - Тэатр ценяў і агнявое шоў. У напамін – пясочная скульптура “Скуты Кейстут” ад Гэніка Лойкі і яго сяброў)

А яшчэ мы:

Святкавалі Купалле на Яновым возеры (на Полаччыне) i на рацэ Іслач пад Ракавам, Каляды ў Крэве і Лылойцах, Гуканне вясны ў Строчыцах і на Менскім гарадзішчы...

Ратавалі выкінутую на гарадскі сметнік археалагічную калекцыю са старога Менска, праваслаўныя могілкі ў Ракаве, Крэўскі замак, Беларусь, будынкі старога шпіталя ў Слоніме, падмуркі палаца Радзівілаў і дом “Гарачы хлеб” 1928 г. у Гародні. Часам паспяхова...

Спявалі і танчылі ў Хаўхоліцы (на Барысаўшчыне) разам з дзецьмі ў доме-інтэрнаце, у вячэрняй школе ва Уруччы для праблемных падлеткаў, для дзетак-беларусікаў з Віленскай гімназіі імя Францішка Скарыны, разам з вясковай моладдзю ў быстрыцкім сельскім клубе, са студэнтамі Кракаўскага Ягелонскага універсітэта ў кавярні “Szafe”, са студэнтамі і не толькі на незлічоных канцэртах і вячорках у нашым родным Універсітэце культуры і мастацтваў...

Ладзілі лекцыі на цікавыя тэмы па гісторыі і культуры Беларусі з удзелам Зміцера Яцкевіча, Анатоля Грыцкевіча, Яўгена Сахуты, Генадзя Сагановіча, Ніла Гілевіча, Уладзіміра Арлова, Эдварда Зайкоўскага і шмат каго яшчэ. На канцэртах у аўдыторыях нашага універсітэта для ўсіх-ўсіх-ўсіх выступалі: “Джамбібум”, “Ліцвінскі Хмель”, “Рахіс”, “Рокаш”, “Гістрыён”, “Рэха”, “Кудмень”, Зміцер Сідаровіч, Паша Кузіч, Таццяна Беланогая, Андрэй Хадановіч і шмат-шмат хто яшчэ.

Смачна елі цэпеліны ад спагадлівай бабулі ў Быстрыцы, вэнджаніну з чорным хлебам з Сержуком Вітушкам у Вільні, печыва з гарбатай у кракаўскіх манахаў-дамініканаў, згушчонку ў Малевіцкім сельсавеце (на Жлобіншчыне), незлічоныя слоікі варэння, кубкі гарбаты і пачкі печыва на сядзібе таварыства “Этна” ува універсітэцкім інтэрнаце №1...

Шукалі Цмока (змея лятучага) падчас трох навукова-этнаграфічных экспедыцый у лютым 2004, 2005 і 2006 г. (г. Расоны на Расоншчыне, в. Быстрыца на Астравеччыне і в. Цыкуны на Гомельшчыне). Самога Цмока пакуль не знайшлі, але сабралі шматлікія сведчанні пра гэтую пачвару: паданні і забабоны. Супрацоўнічаем з Колам беліцкіх даследчыкаў – пакуль што адзіным згуртаваннем цмаколагаў на Беларусі.

Таксама бадзяліся па вуліцах Віцебска, Вільні, Гомеля, Пінска, Полацка, Кракава, Магілёва, Маладзечна, Пухавічаў...

Да канца жыцця будзем удзячныя нашым бацькам; спадарыні Галіне Сівалавай (дырэктарцы Віленскай гімназіі імя Францыска Скарыны) – за давер, наказанне і дараванне; спадару Сержуку Вітушку – за расповеды, песні і светлыя пачуцці; Ядвізе Дамінікаўне Грыгаровіч (былому рэктару Універсітэта культуры і мастацтваў) – за паразуменне і прыклад для пераймання; спадару Мікалаю Іванавічу Тарандзе – за гумар, байкі і прытулак у інтэрнаце гарадзенскага агратэхнічнага універсітэта; магіляўчанам – за матэрыяльна-тэхнічную базу; гарадзенцам – за тое, што яны ёсць (Асабліва Ігару Лапеху, Юру Седзянеўскаму і Янку Лялевічу – за гасціннасць. Мы вас любім!); спадару Юрыю Гардзееву і Ліліі Коўкель – за зацны прыём і ідэйнасць; Уладзіміру Караткевічу; Язэпу Драздовічу; Ігнату Дамейку; Гервасію Выліваху; Юрасю Братчыку; Ларысе Геніюш...

ДЗЕ МЫ

Эл. пошта:

Адказныя людзі таварыства (хаця гэта яшчэ пытанне):

• Павел Каралёў – музеязнаўства, экскурсіі, лекцыі па гісторыі хрысціянства; таксама акцёрскае майстэрства і прорва новых задум. Чалавек-ідэя, таму лепш выслухаць да канца. Старшыня ГКТ “Этна”. +375 29 7762435,
• Алена Арцёмава – студэнцкія абмены з Ягелонскім універсітэтам у Кракаве, пастаянная камунікацыя, якая наклала свой адбітак. +375 29 5915878,
• Раман Абрамчук – музычныя вечарыны, паэтычны гурток і часцяком слушныя прапановы. +375 29 7040018,
• Наста Кадыгрыб – распаўсюджванне інфармацыі: аб’явы, абтэлефаноўка, кантакты з выхаваўчым аддзелам універсітэта. Шчырая ўсмешка, дапамога ў кожнай справе. +375 29 2772944,
• Цімох Акудовіч – ахова гісторыка-культурнай спадчыны, экскурсіі, арганізацыя рэсурсаў і людзей у палявых і інш. умовах. Праца з лічбавымі носьбітамі рознага кшталту. Канструктыўныя размовы і ўзважаныя рашэнні. +375 29 5571124,
• Надзея Пабірушка – вандроўкі, рэдагаванне студэнцкай газеты “Басанож”, жывы ўдзел у кожнай справе, цвярозыя меркаванні. +375 29 7786836,
• Воля Ліпік – прыцягальныя праекты, што выклікаюць жывую станоўчую рэакцыю ўсіх, хто апынуўся побач, адказнасць. +375 29 5989560,
• Марына Каліноўская – народныя спевы, падрыхтоўка да Калядаў, вандроўкі, чароўная ўсмешка. +375 29 6716327

ГКТ “Этна” заўжды адкрытае да новых прапаноў і цікавых ініцыятыў!